Panique sisters nga kilala sa patag sang volleyball ang ginpasidunggan sa ila nga pag pauli sa banwa sang San Enrique.
Isa ka motorcade ang ginpatigayon kaina sang aga sa liwat nga pag abi-abi kag pagkilala sang mag-utod nga Abigail, 24 anyos, kag Arah Ella, 19 anyos nga pareho players sang National University nga nangin champion sa UAAP ukon sa University Athletics Association of the Philippines. Suno kay Mayor Jilson Tubillara ila ginakilala ang dungog nga gindala sang mag-utod sa banwa. Isa ka resolution ang ginpasar nga naga congratulate kay Ara Ellah bilang katapo sang Alas Pilipinas nga nangin bronze medalist sa Asian Women’s Volleyball Confederation Challenge Cup 2024. Nag graduate ang mag-utod sa San Enrique Elementary School kag naka eskwela man sa Our Lady of Purity Academy. Na recruit sila kag didto na nagpadayon sa pag eskwela sa Naga City. Ang ila amay nga si Roger ang naga trabaho sa OLPA. Sila ang naga kuha sang Bachelor of Science in Hospitality Management karon.