Mangayaw kuntani sang billiards ang duha ka mag-amigohay sa syudad sang Kabankalan apang gin-alegar nga sila ang gin-abduct sang puti nga van, Martes sang hapon.
Suno sa 24-anyos nga survivor nga ginkilala kay alyas Niko, residente sang Barangay Villamonte sa Bacolod, nagsakay sila sa Ceres bus gikan Bacolod kag sang pag-abot nila sa proper sang Kabankalan, sila ang ginpwersa sang apat ka mga persona nga magsulod sa van.
Gin-alegar pa ni Niko nga ginhigtan sang cable tie ang duha nila ka mga kamot antis sila gindala sa Barangay Dancalan sa banwa sang Ilog, kun sa diin sila nagpundo kag ginguyod pagwa sa van.
Isa sa mga suspek, suno kay Niko, ang nagpalupok sang armas luthang sa ulo sang iya upod nga si alyas Kirt, 23-anyos, sang Talisay City, rason nga ginbawian ini sang kabuhi.
Sa pihak nga bahin, gin-alegar ni Niko nga siya ang ginmanduan sang mga suspek nga magdalagan samtang nagapalupok sila sang pusil, apang wala siya maigo sang bala kag tigayon nga nakapangayo sang bulig sa mga residente malapit sa area.
Ginsiling ni Police Major Randy Babor, hepe sang Ilog PNP, padayon pa ang interrogation sa nakaluwas nga si Niko kag nagapakig-angut man sila sa mga kapulisan sang Talisay kag Bacolod para mahibaluan kun may mga record ang duha.
Nagahulat man ang kapulisan sa mga tawo nga nakakita sang pag-abduct sa Kabankalan apang as of press time, wala pa sang witness nga naggwa.
Una pa lang ini nga abduction-shooting incident sa Ilog, suno kay Babor, apang ila ginpasiguro nga may lead ang kapulisan sa natabo.