May karga pa nga knapsack sa iya nga likod si Beth Zaida kay nag preparar siya sang pagkaon, bayo kag tualya engkaso makita na ang iya mister nga si Paquito Benedicto.
Ugaling bangkay na sang iya nga mister ang iya naabtan kaina sang aga sa Bago River sakop sang Purok Katilingban, Barangay San Miguel sa Murcia.
Nakibot si Robin Ojeda sang may nakita siya nga kamut nga naga labaw sa suba pasado las diyes kaina. Amo gale yadto ang bangkay ni Paquito.
Istorya ni Beth, wala sila makahibalo nga na anod sa suba ang mister kag ang abyan sini nga si Rupuerto Untal Biyernes pa sang gab-i. Diri sila sa kilid sang suba naga tinir kay naga lawig sang carabao.
Kahapon nasapwan ang bangkay sang iya abyan nga si Rupuerto sa Purok Calibago sa Barangay Lopez Jaena kag didto lang nadiskubrehan nga na anod ang duha sa suba.
Suno kay Kagawad Val Colango sang Barangay San Miguel, sa ila pag lantaw posible nga nag hingagaw ang duha sa pag utod sang higot sang carabao sang maabtan sang daludo sang tubig sa suba.
Nakalab-ot na ang rescuers, barangay officials kag pamilya ni Paquito sa Bago City sa pag usoy pangita sa iya.
Didto man sa bago nakita ang patay nga carabao.
Na ayawan pa ang mga rescuers sa pagpasaka sang iya nga bangkay kay may sapa pa nga talabukon kag tuman ka danlog sang dalan sa lugar tungod man sang sige sige nga pag ulan.
Kaina nakita man ang tatlo ka bulan nga tinday sang napatay nga carabao. Wala untat ang pag hibi sini sa pagpangita sang iya iloy.