Patay ang isa ka maestro, samtang pilason naman ang iya angkas matapos makabunggo ang ila motorsiklo sa naga park nga truck sa Hacienda Ariba, Barangay San Miguel sa La Carlota kaina, Martes sang kaagahon.
Gindala sang rescue team ang duha ka mga biktima sa Don Salvador Benedicto Memorial Hospital, apang gin-deklarar nga patay na ang 29-anyos nga manunudlo.
Base sa traffic investigation, padulong sa Barangay San Miguel ang mga biktima, sakay sa motorsiklo, sang sila ang nakabunggo sa truck, rason nga natumba ang mga biktima sa sementado nga dalan kag nakaangkon sang mga samad sa lawas.
Samtang, isa naman ka senior citizen ang patay matapos mabungguan sang truck sa Sitio Ulalod, Barangay Oringao sa Kabankalan City, Domingo sang gab-i.
Suno sa mga himata, gikan ang biktima sa isa ka birthday celebration.
Ginsiling ni Police Lt. Col. Roberto Indiape Jr., hepe sang Kabankalan Police, nanaug sa isa ka pribado nga salakyan ang 75-anyos nga lola kag nagtabok sa dalan, apang siya ang nabungguan sang truck.
Naglikaw kag nag-preno ang driver sang truck apang nalab-ot ang tigulang.
Suno sa pulis, may portion nga naga kurbada, madulom, kag may blind spot ang dalan sa nasambit nga sitio.
Na-release na ang driver sang truck sadtong Lunes matapos sang settlement sa magtimbang nga bahin.
