Ang Chief of Clinics sang Teresita Lopez Jalandoni Provincial Hospital ang ginhingadlan ni Governor Eugenio Jose Lacson nga magatal-os kay Dr Mary Ann Maestral bilang pamuno sang amo nga ospital kasunod sang appointment sini bilang DOH undersecretary.
Si Dr Francis Gabriel Relota nga amo ang in-charge man sang operations sang TLJPH ang suno kay Governor Lacson magabulos kay Maestral bilang Chief of Hospital.
Ginapasalamatan ni Lacson ang serbisyo ni Maestral nga nagpungko bilang pamuno sang Silay Provincial Hospital humalin sadtong 2021. Yara karon ang TLJPH sa transition.
Suno kay Maestral may 30 diyas siya nga mahuman ang turn-over kag iban pa nga talapuson.
Maga pakig-angut pa siya kay DOH Secretary Ted Herbosa para sa iya nga specific assignment bilang Undersecretary nga isa ka co-terminus position.
“Ang paintindi ko gin gaan ko maximum of 30days. But I need to tie-up loose ends. Indi man pwede na I’ll just up and go”, suno kay Maestral.
Nagligad nga semana niya nabaton ang appointment gikan sa Malacanang.
Pasalig niya plastado ang sistema sang ospital lakip na ang transition plan.