Sa dashcam video nga kuha sang isa ka motorista, makita ang malunang kag madanlog nga alagyan sa Barangay Vista Alegre sa Bacolod City.
Ini ang ginakrelamo sang pila ka mga residente matapos nga nagaserbe ini bilang temporaryo nga alagyan samtang nagapadayon pa ang reconstruction sang porsyon sang Hernaez Street pakadto Bangga Vista Alegre.
Sandig sa mga post sang mga residente sa social media, nangin problema sang mga ginikanan ang alagyan bangud masami nga nagaka-agsikan sang lutak ang uniporme sang ila mga estudyante nga padulong pa lang sa eskwelahan.
Delikado man suno sa ila ang paglabay sang mga motorsiklo bangud kun mag-ulan, madanlog ang ini nga alagyan.
Nakadangat na sa igtalupangod sang siudad ang reklamo sang mga residente.
Ginklaro ni Bacolod City Administrator Atty. Mark Steven Mayo, nga ang proyekto ang indi iya ka siudad kundi iya sang Department of Public Works and Highways.
Gilayon man nga nagpangabay ang siudad sa DPWH nga istoryahon ang MKU Construction and Supply, nga amo ang contractor sang proyekto, nga pangitaan sang iban nga alagyan ang mga residente.
Suno kay Bacolod City Mayor Greg Gasataya, wala nag-coordinate sa siudad ang contractor, rason nga wala mapangitaan sang maayo nga alagyan ang mga residente.
Natalana nga makipagsapol ang City Engineer’s Office sa contractor sini nga adlaw. Nagsugod ang nasambit nga reconstruction sang dalan sang Hunyo 17 kag natalana nga matapos sa Disyembre 14 sini nga tuig.
[sibwp_form id=1]