Ginklaro ni Moises Padilla Mayor Ella Garcia-Yulo nga wala siya naghimo-himo sang istorya angut sa problema sang Central Philippine State University-Moises Padilla Campus nga gina sukot na sila sang pamilya Nazareno nga naga panag-iya sang mga 2 ka ektarya sang duta nga gina tindughan sang eskwelahan.
Paathag sang alkalde mismo ang tagdumalahan sang eskwelahan ang nagpadulong sa iya kag nangayo sang bulig antes pa man sang pinili-ay kay gina sukot na sila sang bayad sa duta nga naga balor sang P50 Million.
2017 pa nag expire ang 10 year nga Deed of Usufruct sang eskwelahan kag ni anay Mayor Francisco Nazareno.
Wala man kuno sang ikasarang ang banwa para bayaran ini gani naghingyo siya sang bulig ni Governor Eugenio Jose Lacson kag nagsiling man ang gobernador nga handa siya magbulig sa banwa para indi ma apektohan ang operation sang ekswelahan.