Nag team up ang Land Transportation Office-6 kag LTO-Negros Island Region agud magpatigayon sang intelligence monitoring kag operation batuk sa mga illegal ukon indi otorisado nga public transport services nga naga-operate sa Negros Occidental.
Nagpatigayon ang otoridad sang surveillance sa Barangay Bata North Terminal sa Bacolod City. Matapos magpanawag sang pasahero ang wala pa makilal-an nga dispatcher, nagsakay ang isa ka undercover LTO agent sa Toyota HiAce Commuter nga gina-usar sa illegal for-hire services.
Suno sa report sang LTO, nakumpirmar sang operatiba nga nagakolekta ang driver sang plete, halin P130 tubtob P200, para sa mga routa nga padulong Cadiz City, Sagay City kag Escalante City.
Pagkahalin sang van, gindakup sang utoridad ang 48-anyos nga driver kag gin-isyuhan sang Temporary Operator’s Permit angut sa colorum operation kag reckless driving.
Gin-impound ang van sa LTO Mansilingan District Office bangud wala ini sang franchise gikan sa Land Transportation Franchising and Regulatory Board.
Magluwas sini, nakadakup pa gid ang LTO operatives sang dugang nga apat ka mga colorum vans sa Bago City.