Bacolod Vice Mayor El Cid Familiaran ang nagapanawagan sa mga nagapinauli nga pumuluyo sa siudad nga estrikto nga sundon ang mga travel requirements.
Ini matapos nga may yara sang isa ka locally stranded individual nga nag abot sa airport kahapon nga ginpaidalum sa RT-PCR test kag wala ginpahanugutan mag home quarantine.
Ini bangud imbest nga RT-PCR test, resulta sang rapid antigen test ang iya ginpakita pag abot sa airport amo kun ngaa gin swab test siya kag gin quarantine anay sa isa ka hotel sa Bacolod.
Suno kay Familiaran, mahimo may kapaslawan man sa bahin sang airline bangud ginpahanugutan ang amo nga persona nga makasakay bisan wala ini sang negative RT-PCR test result.
Base sa travel guidelines sang Bacolod, isa sa mga requirements sang mga nagapauli sa Bacolod amo ang negatibo nga RT-PCR test gikan sa lugar nga ginhalinan ukon point of origin.