BY MARTY GO
Tuman ang kalipay sang 41 anyos nga si Jonathan Espinosa sang makapauli siya sa ila balay sa Barangay Alijis, Bacolod City kahapon.
Tatlo ka adlaw siya nagtenir sa quarantine facility sa ETCS 4 samtang nagahulat sang esulta sang iya swab test.
Bilang isa ka Locally Stranded Individual gikan sa Manila, kinahanglan niya magpaidalum sa mandatory swab testing pag abot sa Bacolod City kag makakuha sang negative nga result para pahanugutan nga makapauli sa iya balay.
Nakapauli na siya sa iya pamilya kahapon matapos makabaton sang negatibo nga swab test result.
Pero iya ginkakibot sang gintawgan siya kagabi sang barangay kag ginpahibalo nga sugaton siya sang ambulansya sa ila balay bangud positibo ang resulta sang iya swab test base sa ila nga data base.
Gintawgan ni Espinosa ang nurse sa quarantine facility nga nag-release sa iya agud klaruhon ang resulta pero nagpangayo ang nurse sang pasaylo sa iya bangud nagwa nga positibo ang iya swab test result.
Siya karon ang yara sa quarantine facility samtang ginpaidalum naman sa home quarantine ang iya pamilya.
Nagalain ang buot ni Espinosa bangud pati ang iya pamilya ang naumid sa sala nga swab test result nga ginhatag sa iya sang otoridad.
Ginpahayag naman ni Bacolod Vice Mayor El Cid Familiaran nga iya ipadangat sa Bacolod Operations Center ang natabo sa kay Espinosa agud mausisa.
Gindugang pa sang bise alkalde nga indi malikawan nga may human error gid man nga magluntad sa pagkuha, pag-process ukon pag encode sang mga swab test result bangud sang kadamuon sang specimen nga ginakuha kada adlaw.