Shadow

Love Negros kag Unega nag file sang COC sa una nga adlaw sang filing sang COC

Pinaka una nga nag file sang certificate of candidacy sa comelec – Negros Occidental si Board Member Manuel Frederick Ko sang third district. Dungan sila ni Board Member Andrew Montelibano kag pareho nga mga re-electionist. Ginpakamaayo sang Love Negros kag UNegA nga mangin batch by batch ang filing sang COC para masunod ang Covid protocols nga gina patuman sang Comelec.

Sa fourth district naman, nag file sang COC para sa SP si board member Jose Cenito Alonso kag si konsehal Andrew Martin Torres nga nag tal-os kay Board Member Victor Javellana nga yara na sa iya ikatlo nga termino. Si Torres ang anak ni Vice mayor Ramon Torres sang Bago City.

Sang hapon, nag file para sa first district ang mga re-electionist nga kanday board member Rommel Debulgado kag Araceli Somosa, sa 6th district naman si Board Member Jeffrey Tubola nga re-electionist.

Pinaka una naman nga nagfile sang iya nga COC bilang kongresista si Representative Ma. Lourdes Marilou Arroyo sang fifth district. Balik pulitika naman si anay deputy house speaker Mercedes Alvarez nga naga plano nga isa sa iya nga itib-ong sa iya nga pagbalik sa kongreso ang pagpatukod sang milk bank.

Kaupod ni Governor Eugenio Jose Lacson sa pag file sang iya nga COC para sa iya nga second term si first district Representive Gerardo Valmayor. Ang vote of approval nga makuha sang coalition suno kay Lacson ang maga tulod pa gid sa ila nga mag hatag sang mas maayo pa gid nga serbisyo. Padayon suno kay Lacson ang bulig nga igahatag sang iya nga panghimanwa sa tunga sang gina batyag karon nga pandemic.

Kaupod naman ni Vice Governor Jeffrey Ferrer sa iya nga pag file sang COC ang iya asawa nga si Rep Juliet Marie Ferrer sang fourth district.

Kuntani may challenger na sa vice gubernatorial race sang mag tuyo file sang iya nga COC ang 33 anyos nga si Jonry Gargarita sang Binalbagan. Pero wala ini ginbaton sang Comelec bangud sang kakulang sang rekisitos.

Ang technical assistant nga si Jaylord Magbanua ang nag file sang COC ni second district Board Member Samson Mirhan nga naka quarantine sa karon.

Malapad man ang social hall kun sa diin ginapatigayon ang filing sang coc, suno kay acting provincial elections supervisor Atty Ian Lee Ananoria liwat niya nga ginapahanumdom ang mga maga file sang COC nga diutayon pa gid ang pagadal-on nga mga kaupod santo sa Covid protocols. Labing gina haylo niya ang mga magapapili nga temprano pa nga mag file sang COC.

Tubtob Oktubre 8 ang filing sang COC nga naga lakip sang Sabado kag Domingo.

Leave a Reply

Your email address will not be published. Required fields are marked *

Secured By miniOrangeSecured By miniOrange