Ang mga tul-an na lang sang 84 anyos nga si Jose Java ang nasapwan sa sulod sang katubuhan sa Talisay City matapos nga madula sang kapin isa ka bulan.
Suno sa Talisay City PNP, nagapangtapas sang tubo ang isa ka sakada sang Miyerkules sang masapwan niya ang bangkay sang senior citizen nga taga Barangay Concepcion.
Oktubre 11 pa ulihi nga nakit-an si Java. Suno sa iya pamilya may yara siya sang alzheimer’s disease gani posible nga nagtalang ini kag nakalab-ot sa katubuhan.
Positibo nga ginkilala sang iya pamilya ang biktima pinaagi sa iya t-shirt nga amo ang iya ginasuksok sang ulihi nga makita. Dugang pa sang kapulisan nga wala sang patimaan sang foul play sa kamatayon ni Java.