Nagpatigayon sang search and rescue operation ang Philippine Coast Guard sa senior citizen nga nadula matapos gin-anod sang makusog nga baha sa Purok 1, Barangay Maloh sa banwa sang Siaton, Negros Oriental, pasado las 5 Lunes sang hapon.
Base sa impormasyon, naanod sang baha ang payag sang 66-anyos nga lalaki nga ginkilala kay alyas “Enrique”, residente sang nasambit nga barangay.
Ginapatihan nga yara ang tigulang sa sulod sang payag kag nadala man sang makusog nga bulyada sang tubig.
May karbaw man nga napatay matapos gin-anod sang baha.
Nagtupa sang Lunes sang hapon ang mabaskog nga ulan sa Siaton kag kaiping nga mga lugar, rason sang pagbaha.
Sini nga Martes, suspendido ang tanan nga klase sa tanan nga levels sa Siaton kag Zamboanguita, Negros Oriental, bangud sang pagbaha, landslides kag malain nga tiyempo.
[sibwp_form id=1]