Arestado ang mag-lolo matapos makuhaan sang P1.3M nga balor sang iligal nga droga, pasado las 12 sang kaagahon sang Domingo sa Purok Lubi, Brgy. 3 siudad sang Bacolod sa ginpatigayon nga buy-bust operation sang City Drug Enforcement Unit kag Police Station 2.
Ang naaresto ginkilala nga sanday Belmer Francia 21 anyos kag Wilfrando Francia 61 anyos lunsay residente sang amo man nga lugar.
Suno kay CDEU Head, Police Captain Joven Mogato, ang subject sa operasyon amu si Belmer nga ginakabig sang PNP bilang high value individual. Samtang ang iya naman nga lolo ang ginakabig sang pulis nga street level individual.
Naga bug-at sang 205 grams kag may standard drug price nga P1,394,000.00 ang nakuha sa ila nga suspected shabu. Detained sila sa custodial facility sang Police Station 2.