Nasapwan nga wala na sang kabuhi ang 77-anyos nga lola sa higad sang suba sa Sitio Lapuz, Purok Dos sa Barangay 3, Sipalay City.
Suno kay Lt. Cipriano Lumanog III, deputy chief sang Sipalay PNP, nagpadulong sa suba ang biktima agud nga manglaba.
Apesar nga may edad na, suno sa pulis, mabaskog pa ang tigulang kag masami nga nagalaba sang iya mga bayo sa suba malapit sa iya balay sa Barangay Mambaroto.
Sang Domingo, nalumos ang biktima.
Base sa imbestigasyon, posible nga nadanlog ang tigulang kag gin-anod sang mabaskog nga daludo sang tubig sa madalum nga parte sang suba, rason nga wala na siya makabutwa.
Wala sang upod ang biktima sang natabo ang insidente.
Nagresponde ang mga katapo sang Philippine Coast Guard kag Sipalay City Disaster Risk Reduction and Management Office.
Gindala ang lola sa Sipalay City Infirmary kun diin ini gindeklarar nga patay.
Ginsiling ni Lumanog nga wala sang foul play sa insidente.
