Apat na ka adlaw nga ginapangita ang lola nga naanod sang mabaskog nga daludo sang tubig sa sapa nga sakup sang Purok Nasalayan, Barangay Inapoy sa Kabankalan City.
Suno sa himata, tubtob karon, wala pa nakit-an ang lawas ni Estrella Barcoma, residente sang Sitio Piliopiliohan sa Brgy. Inapoy.
Nagpatigayon sang search and retrieval operation ang katapo sang Philippine Coast Guard, DRRM Kabankalan, mga opisyales sang barangay kag pamilya sang biktima, halin sang Biyernes tubtob subong nga Lunes, Nobyembre 3.
Pasado las 2 sang hapon sadtong Oktubre 31 sang nagpangani sanday Estrella upod ang iya bana nga si Junior, ila agot kag mga apo.
Masami sila nga nagalabay sa nasambit nga sapa, apang natabu-an nga sang amo nga tion, nag-ulan kag nagbaha, rason nga nagtaas ang tubig sa sapa.
Naka-una tabok ang mga apo kag agot nga bata, apang sang magtabok na ang mag-asawa nga Barcoma, sila ang nadalin-as. Nakapanghawid si lolo Junior sa hilamon apang si Estrella ang gin-anod sang mabaskog nga daludo sang tubig.
Ginhingagaw lagas sang agot ang iya iloy apang wala na niya ini malab-ot.
Nagapanawagan karon ang pamilya sa mga residente sa kaiping nga mga lugar nga buligan sila sa pagpangita kay sa biktima.*