Sa Lunes maga sugod na ang resumption sang Voter’s Registration. Commission on Elections sa Bacolod ang naga paabot nga sa gihapon maga dagsa ang mga maga pa rehistro.
Suno kay Bacolod Elections Officer, Atty Kathrina Trinio-Cana, ini bangud nga kun basehan ang registration sang nagligad nga Hulyo madamo ang wala ma cater pa.
Las 8 sang aga tubtob las 5 sang hapon, Lunes tubtob Sabado lakip na holidays sa bilog nga bulan sang Disyembre sarang maka pa rehistro ang mga botante.
Suno kay Trinio-Cana, magluwas na lamang sa December 15 kag 16 bangud sang special registration para sa Persons Deprived of Liberty, December 17 bangud may special registration man sa Barangay Estefania kag December 24, 26 kag 31.
Sirado ang Comelec – Bacolod sa amo nga mga adlaw.
Sa bulan naman sang Enero may naka schedule na nga mga satellite registration suno kay Cana. Magdala dapat sang valid ID.
Sa 15 to 19 years old naman magdala sang birth certificate ukon baptismal certificate, lakip na ang mga photocopy sini suno kay Trinio-Cana.
Sa mga maga apply naman para sa reactivation sarang nga mag padala sang accomplished form kag valid ID sa email sang Comelec – Bacolod: bacolodcity@comelec.gov.ph
“Gina ayo ta lang nga kumpletuhon. Before mag pa rehistro, may dala na nga valid ID, naka butang dira ang edad, nabutang ang address, diri sila naga istar sa Bacolod, photocopy sang sina nga ID. For 15 to 19 years old aside from the valid ID, additional nga document is birth certificate or baptismal certificate lang. Photocopy man sang ila birth certificate kag baptismal certificate”, suno kay Trinio-Cana.
Tubtob sa Enero 31, 2023 ang voter’s registration.