Katapo sang vegetation kag clearing team sang Negros Power ang karon na-comatose sang mahulog sa gin-utod nga kahoy nga nagasablag sa kuryente sa Barangay Villamonte sa Bacolod City.
Naga-ulan kag mabaskog ang hangin sang ginpang-utod sang katapo sang vegetation team sang Negros Power ang mga sanga sang kahoy nga nagasablag sa mga linya sang kuryente sa kilid sang isa ka call center company malapit lang sa Bacolod City Government Center kahapon, Doming nga adlaw.
Bangud madanlog, aksidente nga nahulog ang 34 anyos nga si Jessie James Torremocha sang hana nga magtakod sang harness sa sanga sang kapin 30 feet nga kataason sang puno.
Nalipong siya kag karon nagapabilin nga na comatose sa ospital. Ginsiling ni Negros Power Chief Operations Officer, Engr. Bailey Del Castillo, katapo sang Carmel Light Manpower si Torremocha nga amo ang ila ginkontrata para manghawan sang mga nagasablag nga sanga kag pati na mga nagkalatumba nga puno sang kahoy nga amo ang rason nga nagluntad ang pag brownout sa pila ka mga lugar samtang mabunok ang ulan sang weekend.
Ang Negros Power ang nagpasalig nga maghatag sang bulig pinansyal sa crew nga taga-Davao.
Nagdesisyon man ang pamunuan sang distribution utility nga ipaiway anay ang clearing operation kun mabaskog ang ulan kag hangin agud malikawan ang kasubong nga insidente