Lima ka mga police station ginaplano itukod dungan sa pag-reclassify sa Bacolod sa “Type A” status.
Sa tuyo nga mas mapasanyog pa ang masarangan sang kapulisan sa pagpasiguro sang kampanya sa peace and order, ginduso sang pamunuan sang Bacolod City Police Office ang plano nga pagpatukod sang lima ka mga dugang nga police station.
Pero ginakinahanglan nga ma-reclassify ang siudad halin sa Type B status pakadto sa Type A status nga kinahanglan sa pag-expand sang clustered police stations halin sa 10 pakadto sa 20 ka police stations.
Ginsiling ni Mayor Albee Benitez nga indi dapat mabilin ang kapulisan sa gina-develop nga supercity gani suportado niya ang plano.
Nalakip sa ginaplano nga tukuran sang dugang nga police station ang Barangay Banago, Estefania, Vista Alegre, Cabug kag Singcang-Airport.
Pabor man diri si Vice-Mayor El Cid Familiaran nga handa suportahan ang request sang kapulisan sa konseho.
Nagapati siya nga dungan sa pagbaskog sang seguridad ang pagsanyog man sang ekonomiya sang siudad.