Sabado sang gab-i sang ginpatigayon ang lights-on ceremony sa Himamaylan City Hall nga ginpamunuan nit Mayor Raymund Tongson kag mga opisyales sang banwa.
Napuno sang nagkalain-lain nga duag ang city hall nga naglakip sang isa ka fireworks display.
Pero, magluwas sa kalingawan nga nahatag sini sa mga nagtambong, pila ka mga netizens ang nag pahayag sang ila nga kabalaka, bangud makit-an suno sa ila ang pagdagsa sa mga puuluyo.
Sa mga litrato kag video, makit-an ang pila sa mga tumalambong nga naga inikit-ikit, apesar kuntani sang ginapatuman karon nga physical distancing.
May mga netizens nga nag comment nga kuntani bangud sang hitabo indi madugangan ang pagsaka sang kaso sang COVID-19.
Sa live video sa page ni Mayor Raymund Tongson, mabatian man ang pagpahanumdom sang master of ceremonies sa public address system nga indi pagkalipatan ang social distancing kag pag gamit sang face mask sang tagsa-tagsa.
Sa interview sang Digicast Negros kay Mayor Tongson, wala nila ginlauman ang pag inabot sang mga pumuluyo.
Rason nga suno sa alkalde sa iya nga speech nag pangayo na siya sang pasaylo nga ang programa indi makapalawig bangud sang COVID protocols.
Malapad ang lugar suno sa iya, pero wala nalikawan nga may pila ka mga wala nagsunod sang physical distancing apesar sang sulit-sulit nga pag pahanumdom kag may mga naga bantay.
“Kadamo man sang portion nga ara. Galing kay may ara gid bala mga areas nga daw you have to do so much para ma call ang attention sang tawo. There was continuing reminder and appeal, even the men in uniform, the city legal team, mga bantay bayan namon, nag idea man. After that gin-call na lang nila akon attention nga ako na lang mahambal then appeal, finish the ceremony”, suno kay Tongson.
May duha pa ka hagna ang lights-on program sang Himamaylan suno kay Tongson kag ini ang ila pa nga tun-an kun paano ipatuman kasunod sang insidente.