Ginpahayag ni Bacolod City Mayor Greg Gasataya nga magahatag ang siudad sang libre nga school bags kag Physical Education Uniforms sa tanan nga mga high school kag senior high school students sa mga pampubliko nga buluthuan sa Bacolod.
Nagpasalig man ini nga ang mga school supplies kag school bag para sa mga kindergarten kag elementary students ang ipanghatag na antes pa mag sugod ang klase sa June 8.
Ini ang base sa City Ordinance 09-16-787 nga nagamandu sa siudad nga maghatag sang libre nga educational materials sa mga estudyante.
Suno sa alkalde, kapin sa 90 million pesos ang pundo nga ginpain sang siudad para sa amo nga programa sa sini nga tuig.
Masobra sa 111,000 ka mga estudyante ang ginapaabot nga makabenepesyo sa amo nga programa.
Panawagan naman ni Gasataya sa mga ginikanan, indi na magbakal pa sang mga school supplies sang ila mga kabataan bangud may ara ihatag ang siudad antes pa magsugod ang klase.
Tuigan na nga nagahatag ang siudad sang school supplies sa mga K to 6 students apang ini palang ang pinakauna nga tion nga magahatag man sang libre nga school bags kag PE Uniforms sa grade 7 to 12 students.*
[sibwp_form id=1]