
May tatlo na ka mga traffic enforcers nga job order workers ang napahalin ni Major Junjie Liba, pamuno sang Bacolod Traffic Authority Office, bangud sa isyu sang extortion humalin sang ini ang nagpungko sa position.
Ini ang ginhambal ni Liba kasunod sang alegasyon ni Councilor Al Victor Espino, chairman sang Committee on Transportation, nga may yara sang korapsyon sa BTAO kag wala gina aktuhan sang liderato.
Suno pa kay Liba, wala niya gina tolerar ang korapsyon sa iya personnel kag siya mismo ang akig man sa mga naga pangilkil.
Suno kay Liba, may nagakabatunan man ini nga text messages nga nagareklamo batuk sa BTAO personnel, pero iya ginapangabay ang complainant nga magkadto sa iya opisina para pormal nga magreklamo nga may ebidensya.
Ginklaro ni Liba nga kon may reklamo, iya ginapatuman sa gihapon ang due proess.
Bukas si Liba sa plano nga imbestigahan ang korapsyon sa BTAO kag nagpasiguro nga maga kooperar sa pagpangusisa.
Samtang, ginpahayag ni Liba, may independent investigation man ini nga ginapatigayon para makilala ang ginalegar nagpangayo sang 1,500 pesos sa estudyante para makuha ang iya na impound nga motorsiklo.
Para kay Liba, posible ini nga matuod pero posible man nga indi matuod.