Manug halin na sa parking area sang Negros CyberCentre ang liason officer kaupod ang duha pa ka mga empleyado sang Negros Occidental Teachers Federation sakay sa SUV sang gin-alegar gin-hold-up pasado las dies Huwebes sang aga.
Gin-istorya nila sa mga pulis nga isa ka wala makilal-an nga lalaki ang nagtaya sa ila sang pusil samtang yara sila sa sulod sang salakyan kag nagdeklarar nga hold-up.
Dala sang nalagyo nga gunman nga naga-angkas sa motorsiklo ang masobra P600,000 nga bag-o lang gin-withdraw sang mga biktima sa malapit nga banko.
Pero suno kay Police Major Ramel Sarona, commander sang Police Station 1, nakita sa nakuha nila nga kopya sang cctv nga halos naga sundanay lang nga nagsulod kag nag-gwa sa CyberCentre ang SUV nga ginasakyan sang mga biktima kag ang motorsiklo nga ginasakyan sang gina alegar hold-up suspects.
Duda sang kapulisan nga posible inside job ukon hold-up me ang natabo nga insidente.
Sa entrance sang parking area kag sa natabuan sang gin-alegar pagpang hold-up may yara sang security guard.
Bisan sila ang wala sang may namutikan nga komosyon taliw-as sa panaysayon sang liason officer suno sa PNP.
Ginpasiguro naman sang pamunuan sang security office sang CyberCentre nga wala sang pagpatumbaya sa mga on duty sadto nga security personnel nga amo man ang nagpa alinton sa mga pulis nga natabuan yara man lang sa kilid sang CyberCentre sa dalan Lacson.
Gintinguhaan nga makuhaan sang bahin ang tagdumalahan sang teachers’ federation pero indi pa sila makahatag sang opisyal nga pahayag angut sa insidente.
Sa record sang Police Station 1, ginsulod man sadto sang gin-alegar kawatan ang opisina sang NOTF sa cordern sang San Sebastian kag Gatuslao street sang nagligad nga Disyembre.