Padayon ang imbestigasyon sang Negros Oriental Police Provincial Office sa pagpatay sa kay Edmar Delosindo, job order worker sang Guihulngan City nga ginpatay sang mga gina patihan katapo sang New Peoples Army sa Sitio Mainit, Barangay Bulado.
Suno kay P/Lt. Stephen Polinar, spokesperson sang NORPPO, 15 kilometros ang kalayuon sang lugar sang insidente sa city proper. May na recover ang mga pulis nga walo ka mga fired cartridge sang 5.56mm rifle sa crime scene.
Ang biktima ang officer sang livelihood association kag anak sang lider sang grupo nga anti-communist suno sa PNP.
Antes matabo ang insidente, may impormasyon nga nabaton ang PNP nga ara ang army sa katupad nga barangay para sa combat operations matapos makabaton sang impormasyon nga may mga NPA sa lugar.
Dugang pa sang PNP kilala ang barangay bilang pugad sang mga rebelde. Martes sang gab-i sang ginpatay sang mga rebelde ang biktima.