Matapos sang pila ka mga insidente sang pagbinungguanay sa dalanon kun diin imbulbado ang slow-moving vehicles kaangay sang motorsiklo kag tricycle, ginasulong karon ang Sagay City Police Station ang hugot nga pagpatuman sang Republic Act 4136 ukon ang Land Transportation and Traffic Code.
Sang Domingo, nagbunggu-anay ang isa ka truck kag motorsiklo sa highway nga sakop sang Hacienda Esperanza, Barangay Población 1.
Patay ang driver sang motorsiklo samtang pilason naman ang iya asawa nga angkas niya.
Sa imbestigasyon, pareho ang direksyon nga ginapadulungan sang truck kag motorsiklo.
Naga-overtake ang truck sa isa ka salakyan sang naghana man nga mag-overtake ang motorsiklo rason nga sila ang nagbungguanay.
Detained ang 31-anyos nga driver sang truck kag nagapangatubang sang kaso nga reckless imprudence resulting in homicide, physical injuries and damage to properties.
Ginsiling ni Police Lt. Col. Alvimar Flores, hepe sang Sagay PNP, nga mas maayo gid kun nagasunod sa traffic rules and regulations agud malikawan ang kasubong nga mga insidente.
Gani, pabaskugon sang kapulisan ang ila kampanya sa mga slow-moving vehicles kaangay sang mga motorsiklo kag tricycle nga mahinay ang speed limit agud malikawan ang mga disgrasya.