Bwas na ang katapusan nga adlaw sang klase sa mga pampubliko nga eskwelahan. May 29 to 31 naman natalana ang graduation.
Suno kay Ian Arnold Arnaez ang spokesperson sang DepEd Negros Occidental, Mayo 28 ang katapusan nga klase humalin sa kindergarten padulong sa high school sa mga pampubliko nga eskwelahan.
Gintalana naman sang DepEd ang May 29 tubtob 31 para sa graduation kag depende na sa eskwelahan sa pag pili gikan sa sini nga mga adlaw sang ila nga schedule para sa graduation.
Sa July 29 naman natalana ang opening sang klase para sa masunod nga school year kag maga takup ini Abril 15 sa masunod nga tuig.
Isa ka semana antes ang school opening amo naman ang pag patuman sang Brigada Eskwela. Yara karon sa transition sa tuyo nga tigayon maka balik sa Hunyo ang pag bukas sang klase.
Suno kay Arnaez may nagakaigo sa gihapon nga bakasyon ukon break ang mga estudyante.
Antes sang school opening ginahaylo ang mga gin-identify nga mga estudyante nga kinahanglan sang intervention nga mag tambong sa national learning camp para mas mapasanyog ang ila literacy labi na sa reading kag mathematics.
Isa ini sa daku nga pagpanghangkat sa Negros bangud indi ma negar nga may mga kabataan nga naga bulig sa ila nga ginikanan sa trabaho labi na sa panguma suno kay Arnaez.
“They will have the whole June (for vacation). Sa July galing masugod na ang national learning camp man. Indi man siya mandatory pero gina encourage gid those nga kumbaga na-identify nga based on assessment kinahanglanon intervention, gina encourage gid ang mga bata nga ina nga mag entra sa national learning camp, dira sila, kumbaga (ginapaidalom sa) intensive nga reading and literacy”, suno kay Arnaez.