Nakuhaan sang CCTV footage ang pagbilin sang lalaki sang box nga may unod nga isa ka bag-ong bun-ag nga baby girl sa naka-park nga jeep sa Barangay Zone 8 sa syudad sang Talisay, Negros Occidental, Domingo sang gab-i.
Nakabati ang nakasapo nga may nagahibi nga bata, kag didto na nila nakit-an ang lapsag nga nakaputos sa lampin, may mga dugo kag higko, pati ang umbilical cord sini ang yara pa.
Gindala ang lapsag sa Talisay City Health Office agud mahatagan ini sang nagakaigo nga medical attention.
Sa karon, yara na ang lapsag sa paghinakop sang Talisay City Social Welfare and Development Office.
Nagabulig na ang Talisay City Police sa pag-identify sang lalaki nga nagbilin sang lapsag, pati na sa kun sin-o ang ginikanan sini.
Wala naman sang residente sa Brgy. Zone 8 nga nakakilala sa lalaki nga nagbilin sang lapsag.
Ginsiling ni Police Lt. Col. Salvador Trono, Jr., hepe sang Talisay Police, kung makilal-an ang nagbilin kag ang ginikanan sang lapsag, sila ang sarang magapangatubang sang kaso nga child abuse.