Sa video nga kuha ni Tuts Plondaya makita ang bahin sang dalan sa Sitio Tambara, Barangay San Fernando sa Talisay City nga natiphag. Tubo na lang sang water supply ang naga pabilin nga waka matiphag.
Katunga sang dalan, na ab ab na bangud sang wala unatat nga pag ulan. Gani one way lang anay ang dalan pero ang ini nga mga salakyan wala na maka labay bangud delikado.
Ang mga residente sa kilid sang Minuluan Bridge sakop sang Barangay Zone 8 ang nakapauli na sang kagab-i pero liwat na naman nag evacuate bangud nagsaka na naman ang tubig sa suba.
Mas dako ang tubig kun ikumpara sang kahapon suno sa mga residente.
Si Renante Obinque, gina kapoy na sang sulit sulit nga pang himos sang bagahe kag pangdagnas. Pero wala man siya sang choice.
“Kulang gani ang tulog ta kay pag abot ta sa balay indi pwede mag higda dayon, mang dagnas ka pa sang salog kag may lutak pa. Manghimos ka pa gid eh manghakot ka pa sang bag-o nga halakuton sa balay mo,” suno kay Obinque.
Upod niya pa ang iya misis nga manug bata, palarehos sila nga halos wala na sang tulog bangud sa baha. Naluoy na lang sa iya bana si Bernadette gani indi malikawan nga naga bulig siya pang himos
bisan naga busong.
Sa EB Magalona naman, sa barangay tabigue amo na sini kataas sang tubig sa may sapa. Gintinguaan pa sang isa ka residente nga takson pero indi matungkad sang 8 ft nga kawayan.
Si Dirk Hermosura may bitbit na nga knapsack. Kun kahapon wala sila nag evacuate subong, desidido na sila sang iya misis nga may evacuate bangud naga saka na ang tubig sa likod lang sang ila nga
balay.
Ang iya katupad balay nga si Romy Aniebe, nag desisyon nga mapabilin lang. Ang iya kabataan, misis kag iloy ato na sa evacuation center sang banwa.