Nagresponde ang katapo sang Bacolod Station 2 matapos makabaton sang report nga may isa ka lalaki nga armado sang armas luthang sa sulod sang computer shop sa Purok Balinday, Barangay 2 sa syudad sang Bacolod, Martes nga adlaw.
Sang pag-abot sang kapulisan, namutikan sila sang suspek nga ginkilala kay Jojo Arnaiz, 37-anyos kag residente sang Brgy. 6 sa Bacolod, rason nga nagdalagan ini pasulod sa pathway sang Purok Balinday.
Gin-alegar nagpalupok sang pusil si Arnaiz, rason nga nagbalos man ang mga kapulisan.
Natiruhan ang suspek kag nadakpan. Ginhingagaw man ini dala sa Corazon Locsin Montelibano Memorial Regional Hospital agud nga ipabulong.
Na-recover kay Arnaiz ang isa ka .45 caliber pistol kag granada.
Sa karon, yara na naka-detain sa custodial facility sang Police Station 2 si Arnaiz kag ini ang magapangatubang sang kaso angut sa illegal possession of firearms in relation to COMELEC gun ban kag illegal possession of explosives.
Ginsiling ni Police Major Eugene Tolentino, hepe sang Station 2 nga bag-o lang nakapiyansa si Arnaiz matapos ginserbe sa iya sang Talisay Police ang warrant of arrest sa kaso nga carnapping.