Sa sulod mismo sang isa ka resort sa banwa sang san Enrique gin patay kaina sang kaagahon ang 33 anyos nga si Ryan Villanueva nga kahapon lang nag selebrar pa sang iya kaadlawan.
Suno sa hepe sang San Enrique PNP nga si Major Renante Salgado, nagakaon lang sa ila nga kwarto sa sulod sang resort ang biktima upod ang iya nobya sang sila ang ginsulod sang lima ka persona nga naka bonnet kag naka jacket.
Suno kay Salgado, gin pa gwa nila ang babaye samtang ang gunman naman ang nag tiro sang makapila ka beses kay Villanueva nga may igu sang bala sa ulo, kamot kag likod. Dead on the spot ang biktima.
Na recover sang kapulisan sa crime scene ang 28 ka fired cartridges sang .45 caliber pistol.
May nakuha man ang kapulisan sa kwarto sang biktima nga suspected marijuana seeds kag mga drug paraphernalia.
Si Villanueva upod sang iya miga kag tatlo pa ka abyan ang yara sa resort bangud didto nila gin saulog kahapon ang iya sini kaadlawan.
Ginahibalo pa karon sang PNP kun ano ang motibo sa brutal nga pagpatay sa kay Villanueva kag ila man usisaon ang report nga ang ginpatay ang involved sa transaction sang iligal nga droga.