Patay ang 51 anyos nga si Emmanuel Sampani matapos gina alegar mag bato sa kapulisan sang siya ang serbehan sang warrant of arrest sang Biyernes sang gab-i sa Barangay Dulao sa Bago city.
Ang PNP Anti-Kidnapping Group gikan Camp Crame upod sang intelligence unit sang NOCPPO kag BCPO amo ang nag panguna sang pag serbe sang warrant of arrest kay Sampani nga wanted sa kaso nga murder.
Sa imbestigasyon sang PNP, sakay si Sampani sa iya motorsiklo kag sang makita na ang kapulisan, siya ang nag panaog kag nagdalagan sa katubohan agud mag panago.
Samtang naga panago, suno sa pulis siya ang nagpalupok sang iya armas sa mga operatiba kabangdanan nga nag balos palupok ang mga pulis kag naigu si Sampani nga nag resulta sa iya kamatayon.
Na recover sang PNP gikan sa suspek ang iya duha ka pusil nga may unod nga mga bala.
Ginpaidalom na sa paraffin test kag autopsy ang bangkay ni Sampani.