Site icon Digicast Negros

Lalaki nga nasapwan patay sa kilid sang baybay, Covid positive nga nagpalagyo sa quarantine facility

Gin-claim na kaina sang aga sang iya himata ang bangkay sang lalaki nga nasapwan patay sa kilid sang pika-pika sa baybay sa Barangay Pahanocoy sang Martes sang aga.

Suno kay Police Major Joery Puerto, Oktubre 30 pa lang sang ila ginpangita ang 40 anyos nga COVID-19 positive nga nag palagyo gikan sa quarantine facility sa Barangay Tangub.

Siya mismo ang naka istorya sa pamilya sang amo nga persona.

Suno pa sa pulis, posible nga nagka depresyon ang amo nga persona sang gin sulod na sa quarantine facility.

Naga-gwa sa karon nga indi lang isa ang nag palagyo gikan sa quarantine facility. Ginkumpirmar ni Dr. Edwin Miraflor nga isa man ka 37 anyos nga taga-Taculing ang ng palagyo sang kahapon gikan sa quarantine facility sa Barangay Bata.

Sini lang nga udto sang nakuha sang EOC – extraction team ang amo nga covid 19 positive kag ginbalik sa pasilidad.

Naka-blotter na sa PNP ang insidente.

Usisaon sang Emergency Operations Center ang natabo agud matagaan ini sang atensyon, ilabi na kun ang mga ginadala sa isolation facility ang nagabatyag sang depression ukon ano man nga sahi sang balatian.

Nagpanugyan na ang EOC sa mga close contact sang mga nalagyo nga magpaidalom sa 14 day home quarantine.

Bisan ang mga pulis nga nag-usisa sa nasapwan nga bangkay ang handa man mag-self isolate agud masiguro nga mapaiway ang posible paglapta sang virus.

Kahapon sang aga sang masapwan ang bangkay sa may kilid sang pikapika. Gikan sa kilid sang baybay, gindala ang bangkay sang COVID positive sa isa ka punerarya.

Exit mobile version
Skip to toolbar