Nakilal-an na ang lalaki nga nasapwan kahapon nga patay sa Bacolod Reclamation Area.
Isa siya ka trabahador sa kampo kag taga La Carlota City, suno kay Police Captain Glenn Montaño, hepe sang Bacolod Police Station 2.
Ginkilala ang biktima sang iya man mismo nga pamilya.
Siya si Marlon Illustrisimo, 32 anyos nga trabahador sa kampo sa Barangay Cubay sa La Carlota City.
Suno sa pulis, pilas tuga sang pagbuno ang kabangdanan sang iya kamatayon Suno kay Montaño, Martes nag linsensya ang biktima sa iya amay nga magalagaw lang ini apang wala na siya makapauli sa ila nga lugar.
Nagapati ang PNP nga ginhaboy lamang sa lugar ang bangkay.
Kahapon nasapwan ang bangkay nga nakabaklid ang mga kamot kag nakaputos sa plastic ang ulo.
Gin usisa pa sa karon sang PNP kun sino ang sa likod sa kamatayon sang biktima kag kun ano ang motibo.