Isa ka lalaki nga nagbuno sang nagresponde nga kagawad, ang natiruhan sang security guard sa sulod sang highland resort sa Barangay Orong, Kabankalan City, Hwebes sang aga.
Naka-agum sang igo sang bala sa natu-o nga butkon ang 46-anyos nga lalaki, samtang may mga buno naman sa likod kag kilid ang barangay kagawad.
Ginsiling ni Police Lt. Col. Roberto Indiape Jr., hepe sang Kabankalan PNP, naga panglagas sang iya mga himata kag nagtuyo nga mamuno ang suspek nga may bitbit nga ice pick.
Nagresponde ang kagawad apang siya ang nabun-an. Nagbulig ang security guard kag natiruhan ang suspek.
Suno kay Indiape, ginahulat na lang nila nga makagwa sa ospital ang suspek kag ila ini iga-detain agud pasakaan sang kaso nga direct assault kag frustrated homicide.
Ang security guard nga nagtiro ang mangin kabahin man sang patigayunon nga imbestigasyon, suno kay Indiape.
Base sa record sang kapulisan, isa ka drug personality ang suspek.