Tatlo ka mga anggulo ang gina-usoy karon sang kapulisan sa pag pangluthang sa mag-utod sa Purok Active, Barangay Mandalagan sa Bacolod City.
Suno kay Police Major Rondyl Tapang, hepe sang Station 3, isa sa tatlo ka mga anggulo amo ang iligal nga droga bangud antes sang insidente, gin-ako sang isa sa mga mag-utod nga naka score sila sa isa ka lugar sa Barangay Villamonte, base man sa testimonya sang mga saksi kag paryente.
Ikaduha nga anggulo amo ang komosyon nga nagluntad sa Libertad kun diin imbulbado ang mag-utod kag ang isa ka parking boy.
Suno kay Tapang, may pagpamahog sa kabuhi sang mag-utod bangud sa nasambit nga komosyon. Ginbalikan sang kapulisan ang parking boy apang wala na ini sa iya ginapwestohan sa Libertad.
Ang ikatatlo nga anggulo amo ang “third party issues” apang nagpamalibad nga maghatag pa sang dugang nga detalye ang otoridad bangud indi pa conclusive ang imbestigasyon kag may ginahimo pa nga procedure ang kapulisan agud mapat-ud ang matuod nga motibo sa krimen.
Samtang, may nakuha naman nga CCTV footages ang kapulisan nga na-capture ang mga suspek. Bangud indi masyado klaro ang kopya, ginpasa ini sa cybercrime office agud maklaro ang mga itsura sang suspek.
Sakay sa motorsiklo ang mag-utod nga sanday alyas “Harold” kag “Harley” sang sila ang ginsundan kag gintiro sang mga suspek nga sakay man sa motorsiklo.
Nagtaliwan ang magulang nga si “Harold” samtang pilason ang iya manghod.