Nadakpan na ang lalaki sa viral video nga nagpanaya kag nagpalupok sang pusil sa mga pumuluyo sang Hacienda San Antonio Dos, Brgy. Dos Hermanas sa Talisay City sang bulan sang Enero.
Suno sa kay Police Major Rhazl Jim Jocson ang Deputy Chief of Police sang Talisay City PNP, ginpangunahan ni Police Lieutenant Colonel Salvador Trono, Jr., ang Chief of Police sang Talisay City PNP ang pagserbe sang warrant of arrest kay Jose Alontaga kag naaresto siya sa Brgy. Taminla banwa sang Buenavista sa probinsya sang Guimaras Miyerkules sang aga.
Si Alontaga ang nagapangatubang sang kaso nga gunban violation kag grave threat kag may 159,000 pesos nga piyansa para sa iya temporaryo nga kahilwayan.
Nangin viral sa social media ang video ni Alontaga matapos nga iya tayaan kag ginpalukpan sang pusil ang mga pumuluyo sa lugar gamit sang isa ka cal. 45 pistol sa tunga sang natabo nga kinagamo bangud sa away sa duta.