Patay ang isa ka lalaki matapos natiruhan sang pulis sa Purok Malipayun, FJE Village, Brgy. Batuan sa La Carlota City Martes sang gab-i.
Suno kay Police Lieutenant Colonel Lowell Garinganao, hepe sang La Carlota City PNP, nagpangayo sang bulig ang isa ka tricycle driver matapos ginlampusan sang suspek ang iya nga tricycle sang tubo.
Gilayon nga nagresponde ang pulis apang pag-abot sa lugar ginpalapitan man sila sang suspek kag ginlampusan sang tubo ang wind shield sang patrol car sang La Carlota City PNP.
Suno kay Garinganao, indi na makagwa ang pulis nga yara sa passenger side bangud ginlampusan man sang suspek sang tubo ang bintana kag bilang depensa sa kaugalingon, gintiro sang pulis ang suspek.
Naigo sang bala sa li-og kag dughan ang suspek kag ginhingagaw dala sa ospital apang ginbawi-an sang kabuhi.
Nakuha sa crime scene ang apat ka bala sang 9 mm pistol.
Base sa panaysayon sang pamilya, pila na ka adlaw nga bayolente ang suspek bangud ini ang gin-atake sang nervous breakdown.
Dugang pa ni Garinganao ang duha ka pulis ang gindis-armahan kag restricted na sa police station.
Ginahulat pa sang La Carlota City PNP ang desisyon sang pamilya sang napatay kon sila ang magapasaka sang kaso batok sa pulis.