Na-capture sa livestream sang isa ka basketball open tournament ang pag-recover sang pusil kag pag ka dakup sang mga pulis sa isa ka lalaki nga nagalantaw sang basketball game sa sulod sang Capitol Square, Barangay Poblacion sa Siquijor, mga las 10 sang gab-i sang Domingo, Setyembre 27.
Sa report sang Siquijor Police Station, bangod naga-init na ang hampang, naglalisay ang isa ka team owner kag ang player sang kontra nga team. Samtang sila ang ginatambagan, nagsaka ang bayo sang 41-anyos nga team owner kun diin naglabaw ang pusil nga naka sukbit.
Gin-subdue sang naka-duty nga pulis ang nasambit nga persona kag nakuha sa iya ang isa ka Taurus G3 9x19mm pistol, 17 ka mga bala, isa ka magazine kag holster.
Suno sa Siquijor Police, ila gin-secure ang lalaki kag ang pusil agod malikawan ang ano man nga kinagamo ukon paglala sang sitwasyon.
Sa verification, naka-present ang lalaki sang Permit to Carry Firearm Outside of Residence, firearm registration, kag License to Own and Possess Firearm.
Apisar sini, ginpadala sang Siquijor PNP ang pusil sa Firearm and Explosive Office para sa evaluation kag assessment. Ila man gin-endorso ang pag-cancel sang LTOPF kag Permit to Carry sang nasambit nga persona.
[sibwp_form id=1]