Naigo sang bala sa likod kag naglapos sa iya tiyan, ang 26-anyos nga lalaki matapos gintiro sa national highway nga sakop sang Barangay Sto. Niño, banwa sang EB Magalona sa Negros Occidental, pasado las singko, Huwebes sang hapon, Hulyo 31.
Base sa imbestigasyon, nagalakat ang biktima nga si alyas “Prince” sa higad sang dalan padulong sur nga direksyon sang siya ang gintiro sang suspek gamit ang wala pa mapat-ud nga kalibre sang pusil.
Gindala ang biktima sa Corazon Locsin Montelibano Memorial Regional Hospital, kun diin siya ang padayon nga ginabulong.
Naga-obra bilang driver kag construction worker ang biktima.
Suno sa pulis, personal grudge ang inisyal nga motibo sang insidente apang ila pa ginahulat nga ma-interview ang biktima agud makahatag sang dugang nga impormasyon agud makabulig sa imbestigasyon.
