Ginpapanaugan sang Land Transportation Office Regional Office 6 sang show cause order ang lalaki nga nag ala superman samtang naga sakay sa motorsiklo sa may dalan sang Don Salvador Benedicto.
Makita sa sini nga video nga gin repost sang LTO sa ila nga Facebook Page nga ang ini nga lalaki ang naga hapa sa motorsiklo samtang naga dalagan ang motor kag may naga kuha sang litrato kag video niya.
Sang Domingo nga adlaw ini natabo suno sa LTO kag gina pangayuan sa karon sang paathag ang rider kun ngaa ginhimo niya ini.
Sa idalom sang Section 48 sang Republic Act No. 4136 wala gina tugutan ang reckless driving ukon ang pagdala sang motor vehicle nga naga butang sa alang-alang sang kabuhi sang kun sin-o man nga tawo.
Suno pa sa LTO delikado ini indi lang para sa driver nga nag ala superman kundi sa iban pa nga motorista ukon persona nga malabyan niya.
Sa comment section sa post sang LTO may netizens nga naga comment nga mas bilib sila ya sa mga naga bike nga naga taklas sa dalanon sang DSB kag padayaw pa more kay may mga motorista nga ginhawa man sa paghalong sa pagbiyahe pero may ara gid haras-haras.
Ginsiling man sang LTO nga padayon sila nga maga monitor sang social media posts nga naga pakita nga may mga motorista nga naga butang sang ila kabuhi kag sang iban man sa delikado nga sitwasyon.