Naglabay sa atubang sang hypermarket sa Cadiz City ang isa ka mister para magsugat sa iya misis Miyerkules sang hapon.
Sakay sa iya motorsiklo, masugat kuntani ang biktima nga ginkilala kay alias Cyrel sa iya misis sang natumbahan siya sang poste.
Sa isa ka Facebook post, dako nga palamangkutanon sa misis ni Cyrel ang natabo sa iya mister. Nagapangayo siya sang paathag kun paano gulpi lang nadula ang iya mister ilabi na nga may duha pa sila ka mga kabataan.
Paathag ni Wilbe Bilbao, general manager sang Northern Negros Electric Cooperative, sa ila inisyal nga technical investigation, nasangit sang mixer truck ang mga kable, rason nga natumba ang primary pole kag isa pa gid ka poste sa area.
Magluwas sa motorsiklo ni Cyrel, natumbahan man sang mga poste ang isa ka tricycle.
Ginpahayag ni Bilbao nga may yara sang financial assistance nga igahatag sa mga naulamid sa pagkatumba sang mga poste apang kinahanglan pa ini sang approval sang Board.
Bangud sa pagkatumba sang duha ka poste, lakip na ang main line source, nagresulta ini sa lapnagon nga brownout humalin las 3:30 sang hapon sang Miyerkules apang tigayon man nga nabalik ang kuryente las 10:21 sang gab-i.
Naga-ayo man si Bilbao sa mga nakakita, may video ukon CCTV footage nga magpalapit sa ila agud magbulig sa imbestigasyon.
“Ang poste na siya is concrete wall, dako na siya, may alambre sa babaw nga amo ang main source nga naga-serve sa Cadiz kag may ara sang neutral nga tunga and then may ara sang kable sang mga telcos nga ara sa dalum-dalum. Kag may duha ka guide nga ga-angut sa poste pakadto sa dalum. So ina, inkaso mautod ang poste, indi na siya directly matumba. Based sa amon initial investigation, may ara sang force. May force nga nagbutong amo na nga nautod ang amon poste tapos dungan pa tumba ang duha ka poste”, suno kay Bilbao.