Isa na ka bangkay ang senior citizen nga lalaki sang siya ang nasapwan sang mga mangingisda nga naga-utaw-utaw sa baybayon nga sakop sang Purok 13, Sitio Capaclan sa Barangay Inayawan, banwa sang Cauayan, Negros Occidental.
Duha ka adlaw antes masapwan ang 62-anyos nga biktima, siya ang ulihi nga nakit-an nga hubog sang duha ka mga kabataan samtang nagatabok sa suba sa Purok 18.
Suno sa mga saksi, nahulog ang lalaki sa suba kag gin-anod sang daludo sang tubig.
Ginkuha sang katapo sang Philippine Coast Guard ang bangkay kag gindala sa barangay hall sang Inayawan kun diin siya ang positibo nga ginkilala sang iya mga himata.
Bangud nagakaagnas na ang lawas sang biktima, wala na ginpaidalum sa post-mortem examination ang bangkay kag ginpakamaayo sang iya pamilya nga ilubong ini sa Inayawan Cemetery.