Personal nga dumot ukon drug-related – ini ang duha ka mga anggulo nga ginalantaw sang kapulisan sa pagpatay sa isa ka mangunguma sa Barangay Tabugon sa siudad sang Kabankalan.
Bag-o gid lamang nakatapos hampang sang basketball ang 40-anyos nga biktima sang siya ang ginpalapitan sang suspek.
Nagdalagan ang biktima apang ginla-ot sang suspek kag gintiro sang makapila ka beses.
Gindala ang biktima sa ospital apang gindeklarar nga dead on arrival.
Ginsiling ni Police Lt. Col. Roberto Indiape Jr., hepe sang Kabankalan PNP, may igo sang bala sa alatrasan kag ulo ang biktima.
Suno kay Indiape nga base sa record sang barangay, may kaangtanan ang biktima sa pila ka mga kinawatay kag suno naman sa iya pamilya, imbulbado man siya sa iligal nga droga.
May lead na karon ang kapulisan sa kun sin-o ang nagtiro sa biktima.
