Isa ka bangkay nga wala ulo ang nasapwan sa Rosario Street sa Barangay 38 sa Bacolod pasado las nuebe kagab-i. Naka posas ang iya nga mga kamut.
May mga saksi nga naka kita sang duha ka mga Toyota Innova nga nag pondo sa dalan. Ginpugutan sang ulo ang biktima kag ginsulod sa sako kag may nag palupok sang pusil.
Ang lugar nga gin bilinan sang bangkay amo man mismo ang lugar kun sa diin ginpatay ang pulis nga si SSgt Joseph Nepomuceno sang Dominggo.
May nakuha pa nga karatola sa kilid sang bangkay nga may ansulat nga bayad sa utang, interest pa lang capital preparar para suma total. Halong Bacolod.
May mga buno kag igo sang bala ang iya nga lawas.
Pila ka minutos ang nag ligad, may gin report naman nga may gin wigit nga ulo sa Purok Sigay sa barangay sa Bacolod.
Indi pa mapat ud sang PNP kun sino ang responsable sa brutal nga krimen.
Sini nga aga ginkilala ni May Castillo Monge nga bangkay sang iya manghod nga si Glenn Paul Castillo ang ginpugutan. Indi niya mabatas ang brutal nga pagpatay sa iya manghud.
Istorya ni Monge, nagsaylo sa Bacolod si Glenn Paul para makaupod ang iya live-in partner nga si Analie Baldevieso kag ang ila 9 months old nga anak.
Agosto 21 sang nadakpan ang maglive-in partner sa buybust operation sang katapo sang City Drug Enforcement Unit ukon CDEU pinaagi sa buybust operation sa Barangay Cabug.
Si Monge ang nagbayad sang pIyansa para sa temporaryo nga kahilwayan sang iya manghud.
Gani nakibot siya sang nanugid sa iya ang kabulig sang iya utod nga may nagsulod nga armado nga lalaki sa ila balay kag ginkuha si Glenn Paul.
Katapo sang CDEU ng ginpatay nga pulis sang Dominggo. Gina usisa pa sang PNP kun bala konektado ang pag patay sa pulis sang Dominggo sa pag patay kay Castillo.
Hustisya ang gina pangayo sang pamilya Castillo sa brutal nga pagpatay sa ila himata.