Isa ka bangkay sang lalaki ang nasapwan sang kapulisan nga nalubong sa kampo sa Purok Inday Uya sa Barangay Vista Alegre sa Bacolod.
Suno kay Police Lieutenant Conrado Espino, hepe sang Police Station 7, napanimahuan lang sang pamilya nga naga puyo malapit sa kampo ang patay gani sang ila nga ginkadtuan, nakita ang nagalabaw nga tiil sang bangkay nga gin lubong.
Posible suno kay Espino nga malapit na isa ka semana nga nalubong ang bangkay sang makita bangud sa yara na ini sa state of decomposition.
Kahapon nakilala sang pamilya ang bangkay nga amo ang ila missing nga himata suno kay Espino bangud sang suksok sini nga anklet.
Siya amo si Genesis Nemenzo nga suno sa pulis sang Hunyo pa gina pangita sang pamilya bangud wala na ini nakapauli.
Hibaluon pa sang pulis kun mapasugot ang pamilya nga ipa autopsy sang pamilya ang bangkay agud mahibaluan ang iya sini ginkamatay.