Nakuryente ang isa ka lalaki sa ibabaw sang poste nga iya gin-alegar ginkawatan sang kable las 6:30 Lunes sang aga.
Ang suspek ginkilala kay Johnvic Lumayao , 34-anyos kag residente sang Purok Himaya, Brgy. Alijis, siudad sang Bacolod.
Sa imbestigasyon sang kapulisan, ang suspek kag iya duha ka upod ang nagasakay sa traysikol sang sila ang nagpondo sa Burgos Street, Brgy. 18, Bacolod City.
Ang suspek nagsaka sa poste kag gin-utod ang kable sang internet.
Samtang ginadaho sang suspek ang kable sa duha niya ka upod, gulpi lang siya nakuryente kag nalipong.
Ang duha niya ka upod ang nagpalagyo sakay sa traysikol kag dala ang ila ginkuha nga kable.
Matapos ang pila ka minuto, nakabugtaw ang suspek kag nakapanaog sa poste.
Ginpabalo ang suspek sang krimen nga iya nahimo kag gindala sa Corazon Locsin Montelibano Memorial Regional Hospital para sa nagakaigo nga pagbulong.
Pasakaan siya sang kaso nga theft samtang gina pangita naman ang iya kaupdanan.