Igo sang bala sa ulo ang naagum sang wala pa makilal-an nga lalaki matapos ini ang ginluthang sa isa ka computer shop sa Purok Lubi, Barangay 3 sa siyudad sang Bacolod, Lunes sang kaagahon.
Ginsilingin ni Police Major Eugene Tolentino, hepe sang Bacolod Police Station 2, nga base sa ila imbestigasyon kag panaysayon sang mga saksi, tupaday nga nagahampang sa computer shop ang biktima kag ang suspek, nga padayon pa man nga gina-identify.
Suno sa mga nakakita, may upod nga isa ka babayi ang suspek kag samtang nga naga-istoryahanay ang mga ini, may gamay nga paglalisay sa ila nga duha.
Ginpahayag man ni Tolentino nga ang biktima, nga yara sa tupad sang suspek kag sang babayi, ang ila man nga ginpabati-batian.
Matapos sini, naglisensya ang suspek nga mangihi kag naglakat, apang sa iya pagbalik, iya na gintiro ang biktima.
Ginabulubanta sang kapulisan nga naga-edad 38 tubtob 40 anyos ang biktima, nga nakasuksok sang itom nga t-shirt kag khaki nga shorts sang nagluntad ang krimen.