Nasapwan kahapon sang aga sa kilid sang higway sa Barangay Aguisan, Himamaylan City, ang bangkay sang isa ka lalaki nga naka gapos ang kamut kag tiil, kag naputos sang packing tape ang ulo nga may igu sang bala.
Suno sa Himamaylan PNP, posible nga sa amo man nga lugar gin tiro ang biktima bangud sa may nabatian kagab-i nga lupok sang armas ang mga residente.
Pagka hapon, nakilal-an ang biktima matapos making angut ang iya sini pamilya sa Police Station 4 sa Bacolod.
Ang biktima amo ang 46 anyos nga si Levy Ortega nga gin kuha sang mga armado nga lalaki sa ila nga balay sa Barangay Estefania sa Bacolod sang Sabado sang gab-i.
Suno kay Major Ritchie Gohee, hepe sang Police Staiton 4, nanugid ang menor de edad nga anak sang biktima nga may mga armado nga persona nga nagsulong sa ila nga balay kag ginpangita nga persona sa ila amay.
Sang wala sang may makita, ila gin bitbit si ortega nga nasapwan na lang patay pag ka sunod nga aga.
Dugang pa ni Gohee, imbolbado man sa transaksyon sang iligal nga droga si Ortega. Nakita man tupad sang biktima sang masapwan ini ang isa ka placard nga naga tuhoy kay Kap Macoy ukon ang anay punong barangay sang Aguisan nga si Anthony Javelosa. Si Javelosa ang naga padalagan man karon congressman sa 5th District.
Pero suno kay Captain Romulo Gepilango, deputy chief sang Himamaylan PNP, naistorya na sang imbestigador si Javelosa kag iya gin pahayag nga indi niya kilala ang gin patay nga biktima.
Iya lang kilala ang isa sa mga ngalan nga ara sa placard kag indi niya kilala ang isa pa ka pangalan. Gina usisa pa tubtob sa karon sang PNP ang posible motibo sa pag patay kay Ortega.