Nadulaan sang iloy ang 3 ka tuig nga bata bangud sang vehicular accident nga nagluntad sa nabukid nga bahinu sang Sitio Nagpintal, Barangay Balayong sa Pamplona, Negros Oriental, kaina sang aga, Agosto 26.
Naglapaw ang motorsiklo nga gina-maneho sang 18-anyos nga iloy, residente sang Barangay Nangca sa Bayawan City, Negros Oriental, sakay ang backrider sini nga ginkilala kay alyas “Rose.”
Patay ang lady rider nga si alyas “Cris” samtang gindala naman sa ospital ang backrider.
Nag-gwa sa imbestigasyon sang kapulisan nga sakay sa Honda Click nga motorsiklo ang mga biktima kag nagapadulhog sang sila ang naglapaw sa dalan kag nahulog sa pil-as.
Ang lugar nga ginluntaran sang insidente ang dulhugon kag suno sa mga residente, madamo na sang nagaka-disgrasya diri.
Nagapang-deliver sang cellphones kag iban pa nga gadgets ang mga biktima.
Suno sa abyan ni “Cris”, tuman na ang kahidlaw sang iloy sa iya bata bangud naga-libot ini sa mga lugar sa Negros Oriental agud mag-deliver sang mga gin-order nga gadgets sa ila.
Buwas nga adlaw, kaadlawan pa sang bata ni “Cris.”
Dugang pa sang abyan nga grabe ang panginkamot ni “Cris” para sa iya bata, nga may cerebral palsy, rason nga may kabudlayan siya sa paglakat kag paghambal.