Gobernador Eugenio Jose Lacson ang pabor sa Negros Island Region kag naga laum nga kuntani kabahin lamang sang transition ang gina duso nga sub-regions.
Madamo pa sang luyag nga ma klaruhan ni Governor Lacson bahin sa gina duso man nga pag tuga sang Region 6 kag 7 nga sub-regions tigaylo sang Negros Island Region.
Nalakip na diri suno kay Lacson amo nga sa idalom sang mga sub-region may yara man bala sa separado nga Regional Development Council kasubong man ang maga pamuno kag ang mangin rango sang mga regional offices nga ibutang sa Negros Occidental.
Kay proposal pa man lamang nagahulat ang gobernador sang paathag kun paano mag function ang gina duso nga sub-regions. Ang National Economic Development Authority kag ang Department of Budget and Management ang nag propose sang Region 6B kag Region 7 B para masabat ang panawagan angut sa mas efficient nga delivery sang services.
Sa idalom sini mga national government offices nga nabase sa Iloilo ang may satellite offices nga ibutang sa Negros Occidental kag Bacolod. Amo man ang matabo sa Region 7 sub region.
Suno kay Bacolod Mayor Albee Benitez padayon pa ang pagtalakay sini sa karon.